कविता-गजल

पहाडी कन्दरा फोरी, बगेकी निर्झरीसरि।

चिरी शब्दार्थको कोख,जन्मन्छ्यौ कविता-परी।

बिजुलीरूपमा मानौं मुस्कान घनश्यामको

आराध्या कविता तिम्रा, परिभाषा थरीथरी।।

तिर्खालु जलधाराले तिर्खा सानन्द मेट्दछ

त्यहीबेला कुहू गर्छ्यौ चित्तमा कविता-चरी।।

लय-छन्द तिमी हैन,भेटिन्छ्यौ लय-छन्दमा

जड-चेतनको नाता गाँसिए-छुट्टिएसरि

शिल्पीले जसरी दिन्छ ढुङ्गामा पनि जीवन

अनुभूत तिमी हुन्छ्यौ वाणीमा दिव्य-सुन्दरी