टुक्राटुक्री
कल्पना-सिर्जना जस्तै शास्त्रले पारिने थला।
बैंसालु कविता हुन्छिन् बेलाबेला रजस्वला।।
-------------------------------------------
समाधान कहाँ हो म?समस्यामय कष्ट हुँ।
भेषले पाण्डुकै पुत्र मनले धृतराष्ट्र हुँ
----------------------------
बनूँ म आकर्षक रङ्गबाट
कि चित्तहारी म सुगन्धबाट
पराग-सम्प्रेषणका निमित्त
जिऊँ म मीठो रसबन्धबाट।
------------------------
लिन्छन् वन-पुष्प रङ्ग तिनका उड्छन् र झर्छन् तर।
वैलिन्नन् मन-पुष्पतुल्य कविता लेखेँ-दिएँ आखिर।।
फूलका रस छन् व्यर्थ चुस्तैनन् जब माहुरी।
विनापाठकका मानौं कविता-काव्य-माधुरी।।
-----
आफ्नो चिन्तनधाराको सफा गर्न मुहानमा।
उल्टोबाट पसेकोछु तिम्रा ज्ञानपुराणमा।।
----
आफ्नै हिर्दयमा पाएँ मैले उत्तर प्रश्नको।
मृत्तिकामै हुनेरैछ विराट् दर्शन कृष्णको।।
माटो हो पृथिवी सिङ्गै अनेकौं उपयोगिता।
यसैमाथि चलेकाछन् मान्छेलका प्रतियोगिता।।
---
शरणागतको पीडा हर्छन् सन्त प्रयासले।
मेट्छ बेसारको दाग घाम आफ्नो प्रकाशले।।
---
दुष्टले जो कसैलाई बिगार्ने सूत्र लाउँछ।
तुलसीमठमा कुत्ता सधैँ मूत्र बगाउँछ।।
----
सुन्तला गुलियो हुन्छ, महङ्गो छ बजारमा।
निचोर्छन् तैपनि मान्छे कागती नै अचारमा।।
---
नेताको प्रभु-इच्छाले हुन्छ वर्धन-मर्दन।
हेर्दा अर्जुनको बाण कृष्णको हो सुदर्शन।।
-----
थाले आपसमा जुध्न क्रान्तिका लबटाहरू।
चर्किएपछि हाँडीका बजेझैं खबटाहरू।।
----
भरियो खेतसन्सार धान काट्ने किसानले।
आकाश ढाकिएजस्तै गौंथलीको बथानले।।
------------
जस्तोसुकै अवस्थामा गरें मैले भलाइ नै
बदलामा गरे नित्य बलात्कार मलाई नै।।
