मुक्तक

जता कल्पना मोहिनी-बाहुपाश
त्यता साधना-सिद्धिका छन् प्रयास।

जहाँ स्वप्नदर्शी कलाकार हुन्छ
त्यहाँ गर्दछे सिर्जना-श्री-निवास।।

---------------------------------

म भक्त हेर्दा सुकिलो पजारी

छ भित्र मैलो मलिनो भिखारी।

दोकान वा देवल'ईश' बेच्ने

व्यापारको अब्बल कर्मचारी।।

------------------------------

तारा चुल्बुल-बीचमा हिसिमुखे खै जून छन् रातमा?

धोएको नवशीतले हृदयको तस्बीर खै पातमा?

पाठा आँगनमा थुँगा विटपमा आकाशमा गौंथली

खुल्दो मौसम खै कहाँ छ पुरमा छन् रिक्तता साथमा?

-------------------------------

पीडा:-

गङ्गा सुन्दर चन्द्रमा छ शिरमा शोभा कि सौता भनूँ?

बुझ्दैनन् मनका कुरा अधसुरा भर्ता कि द्यौता भनूँ?

के देखें हरमा र शून्य घरमा ब्यौली बनी भित्रिएँ

केको आज विरक्तिले 'गिरिसुता'स्यौली बनी लत्रिएँ?