उनी यस्ती (गीति-गजल)

सन्सारको 'स्वर्ग' तिमी, पाऊँपाऊँ जस्ती ।
हिर्दयको 'तीर्थ' सधैँ, धाऊँधाऊँ जस्ती ।।

गाईबस्तु हेर्न जाँदा, मौका मिलाएर ।
वैशाखको 'काफल' टिपी, खाऊँखाऊँ जस्ती ।।

एकान्तमा गुन्गुनाउँदै, कोल्टो परी बग्ने ।
'निर्झर'मा नुहाउँन, जाऊँजाऊँ जस्ती ।।

तारे-माले जोतेपछि ,फुर्सदको बेला ।
असारको 'गीत' रची, गाऊँगाऊँ जस्ती ।।

घामपानीमा ओत लाग्ने, सहारा र शोभा ।
सानो-सानो मेरो 'घर', छाऊँछाऊँ जस्ती ।।

आँगनमा फक्रिएकी, शयपत्री-फूल ।
छातीभरि 'माला' उनी, लाऊँलाऊँ जस्ती ।।

काँधैमाथि बोकिरहूँ, धानको बाला जस्ती ।
पिरतीको 'दाईं' तिमी, दाऊँदाऊँ जस्ती ।।

गाउँबस्ती उल्टिएर, पञ्चैबाजा ठोकी ।
बेठी लाउने 'धर्ती' मेरी, साऊँसाऊँ जस्ती ।।