मुक्तक

सक्नेले माल बुझाएर हाकिमी ठिमठिम गर्ने हो ,
नसक्नेले च्याखेका लागि हिमचिम गर्ने हो
यी दुबै खेलका लागि योग्यता हासिल नगर्नेले
नैतिकताको गीता पढ्दै आँखा चिमचिम गर्ने हो ।।

००००००००००००००००००००००००००००००००

सुनिन्छ,आयल निगम चरम घाटामा छ,
बेच्नुपर्ने तेलको ट्याङ्कर सबै माटामा छ
माफियाले चलाएको देशमा यस्तै हुन्छ
फेरिपनि सरकार मूल्य बृद्धिको बाटामा छ ।।
००००००००००००००००००००००००००००००
आँगनको धूलोमैलो गोबरले छोप्छ 
जगलको बीजलाई पत्करले छोप्छ
कान्छी नानी! समस्यामैं समाधान हुन्छ
पशुपन्छी लाज आफ्नो पुच्छरले छोप्छ ।।
००००००००००००००००००००००००००००
सुनामीले बगाएको मूल्यवान् मोतीजस्तो भएछ,
यता छोप्दा उता खुल्ने रेशमको धोतीजस्तो भएछ ।
आजभोलि  राजनैतिक व्यापार बनेको मार्क्सवाद
भाले मरेर गुँडमै थुनिएको धनेशको पोथीजस्तो भएछ ।।
०००००००००००००००००००००००००००००००००००
पिआर र 'डिबी' पर्नेलाई जागिरबाट धपाउनुपर्छ
दाइजोमा 'बिबी' पर्नेलाई मन्त्री क्वार्टरमा पठाउनुपर्छ
घुस र कमिसन त लोकतन्त्रका गहना हुन् साथी
यसमा सहमतिको 'सिबी' भर्नेलाई सरदार बनाउनुपर्छ ।।
००००००००००००००००००००००००००००००००००००००
पूर्णिमाको जून थियो बादलको बीचमा,
हिर्दयको धून थियो मादलको बीचमा ।
सुनमाथि सुगन्धको ताज देखें मैले।
धून बज्ने जून थियो गाजलको बीचमा ।।
००००००००००००००००००००००००००००
लेकमा बर्सिने बादल,बेंसीमा पनि बर्सिन सक्छ,
दाइतिर फर्किएको भेडो,भाइतिर पनि फर्किन सक्छ ।
रुन्देहीका तेल चोरलाई जेल हाल्ने हिम्मत कसको ?
यहाँ त तेलको लहरो तान्दा राजनीतिको पहरो गर्जिन सक्छ ।।
००००००००००००००००००००००००००००
बलि चढ्ने मन्दिरमा धरमद्वारको दर्शन ?
देश बेची विदेशको हरिद्वारको दर्शन ।
सिद्धान्तका सप्तरङ्गी प्वाँख फिंजाएर
राजनीतिको मयूर-नृत्य, मलद्वारको दर्शन ।।
०००००००००००००००००००००००००००
मरेपछि भारत पसी पितृ माग्छन् पिण्ड।
जनताभन्दा द्यौता धेरै,कोटिकोटि झुण्ड ।
धर्म-कर्ममात्र कहाँ,राजनीति झन् उल्टो
नेता ठान्छन् दिल्लीलाई जिउँदो बक्रतुण्ड ।। 
०००००००००००००००००००००००००००००
नदेखूँ नभेटूँ भिजेका परेली
सधैं भेट्न पाऊँ बुझेका परेली ।
नबिर्सूँं कि बिर्सूं? म अन्योलमा छु
वियोगी व्यथाका बिझेका परेली ।।
०००००००००००००००००००००
कालो धनलाई दाइजो र पेवा भन्नेले देश चलाउँछन्
नुन चटाउने मालिकको कुकुर देख्दा  केश कन्याउँछन् ।
लोकतन्त्रकै नाममा लूटतन्त्र मौलाउँदै जाने हो भने
एकदिन गङ्गामा नेपाली स्वाभिमानको अवशेष बगाउँछन्।।
००००००००००००००००००००००००००००००
भागबन्डाको देउसी चल्छ,संयन्त्रको खेलमा
सेलपुरी पाक्दोरैछ डिजेल-मट्टितेलमा ।
तस्करको सरोकार छ,नातेदार हो चोरको
बिष्ठा बस्छ चौतारीमा निष्ठा जान्छ जेलमा ।।
0000000000000000000000000000000000
गुम्बासँग नाता तोडी जुम्बा जान थाल्यो,
बाह्रबजे रातीसम्म तुङ्बा तान्न थाल्यो ।
मन्त्रीजीको पिउँने साथी कानुनभन्दा माथि
कमिसनको ढलमतीलाई गङ्गा ठान्न थाल्यो ।।       
००००००००००००००००००००००००००
भन्न पाइयो वाग्मतीको, अब पानी सफा भयो
चाँडै सुन्न पाए हुन्थ्यो, राजधानी सफा भयो ।
स्वर्ग मलाई चाहिएन,श्रमको साथ भए पुग्छ
मात्र यति भन्न पाऊँ,हाम्रो बानी सफा भयो ।।
०००००००००००००००००००००००००
तारलाई जोड्छ-तोड्छ फलामको पिलास
शत्रु-मित्रु बनाइदिन्छ सोमरसको गिलास
गिलास र पिलासको दुबै काम गर्ने
औजार भो वामपन्थीको सस्तो बुद्धिविलास ।।
००००००००००००००००००००००००००००
 अचम्म छन् हाम्रा रीत र उदेक लाग्दा परम्पराहरु
प्रत्येक आरोहणमा सगरमाथाले पाउँछ धराहरु।।
मान्छेको नाङ्गो आँङ र हिमालको पोसाक देख्दा
आजभोलि खित्का छोड्छन् बाँझो खेतका गह्राहरु  ।।     
०००००००००००००००००००००००००००००००००००००    
सगरमाथाको उचाइ बढेको छ,प्रत्येक पलको फोहोरले
मेरो सरकार चलेको छ,वैदेशिक ऋणको मोहोरले ।
सभ्यता र आयु चुहुने प्वाल परेको घैंटो मलाई  
खित्का छोडी गिज्याएझैं लाग्छ अहिलेभन्दा पोहोरले  ।।
00000000000000000000000000000000000
यहाँ पैसाले जुनसुकै गाडीको चेसिस किन्न पाइन्छ
कागज मिलाउने र हाकिम फकाउने पेन्चिस किन्न पाइन्छ ।
उपल्लो नेतादेखि लगनको केटासम्म बिक्ने देशमा
आजभोलि चौबाटोमा डिग्रीको थेसिस किन्न पाइन्छ ।।